ئەحمەد تورک: ئەو زیانەی دەسەڵاتی ئەردۆگان گەیاندوویەتی زۆر گەورەترە لەوەی بومەلەرزەكە

جیهان, کوردستان, گرنگ

نووسەردەرچە

شوبات 17, 2023

246

0

سیاسەتمەداری کورد ئەحمەد تورک کە بەشداری کارەکانی هاوکاری لە سەمسوری کردبوو رایگەیاند، “ئەو زیانەی دەسەڵاتداری گەیاندوویەتی لە زیانەکانی بومەلەرزەکە گەورەترە”.

وتەبێژی هەدەپە ئەبرو گونای، سیاسەتمەداری کورد ئەحمەد تورک، هاوسەرۆکی کەجەدە بەدران ئۆزتورک، بەڕێوەبەرانی دەبەپە و پەرلەمانتارانی هەدەپە ئەمڕۆ لە سەمسور بەشدارییان لە چالاکییەکانی هاوکاری گەیاندندا کرد.

شاندەکە سەردانی جەمخانەیان کرد کە هاوکارییەکانی تێدا ئامادە دەکرێن و خواردنگەیەک کرد کە لەلایەن شارەوانی چنارەوە دروست کراوە.

ئەحمەد تورک لەوێ قسەی کرد و وتی، “ئەمڕۆ لە ١٢یەمین رۆژی کارەساتەکەداین. بە داخەوە گەلەکەمان رووبەڕووی مەرگەساتێکی گەورە بووەتەوە. بەپێی لێکۆڵینەوەکانمان تەنیا لە سەمسور دەیان هەزار کەس ژیانیان لەدەستداوە. بە داخەوە والی ئێرە ئاگای لەگەل نییە. والی سەمسور ئاگای لە کارەساتەکە نییە. کاتێک هاتینە ئێرە، کەس بەو وێرانکاریە رانەگەیشتبوو. بۆ رزگارکردنی خەڵک لە ژێر داروپەردووی خانووە رووخاوەکان هیچ هەوڵێک نەدرابوو. بەڵام ئێمە ئەو راستیەمان بینی، نەک هەر گەلی کورد لە چوارلای تورکیاوە خەڵک هاتن بۆ ئێرە. گەل هەوڵیدا شتێک بکەن. بەتایبەتی رێکخراوە مەدەنییەکان، پارتە چەپگرەکان و هەدەپە لە رۆژی یەکەمەوە هەوڵیاندا خۆیان بگەیەننە هەموو شوێنێک. دەوڵەت هەوڵیدا رێگریی لەو چالاکییانە بکات. ئەو هەوڵانە هێشتاس بەردەوامن.

وەک دەزانن لە پازارجخ ئەو شوێنەی ئێمە هاوکاریمان تێدا کۆدەکردەوە دەستیان بەسەردا گرت. لەوێس قەیومیان دانا. ئەمرۆش بۆ هەڤاڵانمان لێرە تەنگوچەڵەمە ساز دەکەن، دەمانەوێت خۆمان بگەیەنینە گوندەکان، بەڵام ئەو هاوکارییەی بۆ ئێرە دێت دەستی بەسەردا دەگیرێت. لێرە ئێمە بەرەوڕووی مەرگەساتێکین. ئێمە گەورەیی مەرگەساتەکە دەزانین. ئەو کارەسات و زیانەی دەسەڵات سازی کردووە لەوەی بومەلەرزەکە گەورەترە. حکومەت بەم جۆرە کە چەندین رۆژ هیچی نەکرد، لەبەر ئەوەی چاوەڕێی دەسەڵات بوون، هیج کارێک نەکرا، زۆر رێکخراو کارەکانیان راگرت. کاتێک مرۆڤەکان لە ژێر داروپەردووی خانووە رووخاوەکاندابوون، هیج کارێک ئەنجامنەدرا. بەڵێ ئەوان چی دەکەن با بیکەن، بە شەو و رۆژ هەوڵماندا خۆمان بگەیەنینە گەلەکەمان. پارتەکەمان ئەمڕۆ نەک هەر لە سەمسور، لە پازارجخ، مەرەش، ئەلبیستان، هاتای و دیلۆکیش لەگەڵ زۆر رێکخراوی مەدەنی، لە هەوڵێکی گەورەدایە. ئەوان چیدەکەن با بیکەن، بە دڵنیاییەوە ئێمە لەگەڵ گەلەمانداین ئەم دۆخەش پێکەوە تێدەپەڕێنین”.

‘دەوڵەت خێمەشی نەنارد’

لای خۆیەوە ئەبرو گونای وتی، “دەوڵەت نەیتوانی گەلەکەمان رزگار بکات، نەیتوانی تیمی فریاگوزاری رەوانە بکات. دەوڵەت خێمەشی نەنارد. ئەوانەی لە بومەلەرزە رزگاریان بوو بە برسێتی، تینویەت و سەرما جێهێڵدران. لە یەکەم ساتەوە، پارتەکەمان هەوڵیدا خۆی بگەیەنێتە هەموو شوێنێک. لەپێناو دابینکردنی پێداویستییەکان کەوتینەتە ئامادەباشییەوە. لە یەکەم رۆژەوە هاتین بۆ ئەو شارناەی بومەلەرزە تیایاندا روویدابوو، لەگەڵ هاوڕێ خێرخواز و خۆبەشەکانمان چالاکی زۆرمان بەڕێوەبرد.

لە کۆی زیاتر لە ٦٠ شارەوانی تەنیا شەش شارەوانیمان قەیومی بۆ دانەنراوە. ئەو شارەوانیانەشمان کە قەیومیان لەسەر دانەنراوە لەپێناو هاریکاری لێقەوماوانی بومەلەرزە کەوتنە ئامادەباشی و سەفەربەرییەوە. ئەگەر شارەوانییەکانمان دەستیان بەسەردا نەگیرایە، زوتر برینی گەلەکەمان ساڕێژ دەکرد. جارێکیدیکە دەیڵێینەوە، ئێمە کۆمەڵگای دیموکراتیکی گەلان، کۆنگرەی دیموکراتیکی گەلان، دەبەپە و هەموو پێکهاتەکانمان لێرە، درێژە بە کار و چالاکییەکانمان دەدەین”.

دەرچە