ئەگەر جارێک فێڵت لێکردم خوا بتگرێ ، ئەگەر دووجار فێڵت لێکردم خوا خۆم بگرێ
نوسینی: دلێر ئاکرەیی
نووسەر و شاعیری سکۆتڵەندی جۆرج مەک-دۆناڵد لە حیکاتە خەیاڵەکەیدا بە ناوی لە پشتەوەی باهۆزی باکوور و لە زاری پاڵەوانی چیرۆکەکەیەوە کە منداڵێکە بە ناوی دایمۆندی بچووک، باس لە گەشتەکەی دەکات بۆ دیوی پشتەوەی باهۆزی باکوور کە لە شوێنێک کەوتووتە خوارەوە و تەنیا کیژۆڵەیەکی بینیوە، بەڵام نەیتوانیوە بدوێنێ، چونکە خەڵکی ئەوێ نادوێن و تەنیا بە سەیرکردنی یەکتر لە هەموو شتێک تێک دەگەن.
هەروەها خەڵکەکەیشی بە تەواوی قایلن بە ژیانەکەیان، بەڵام تەنیا کەمێک غەمگینن، کە واتە بەختەوەر نین، وا دیارە چاوەڕوانی ئەوەن کە رۆژێک بێت و بەختەوەرتر بن.
کەچی خەڵکەکەی هەرێم دەتوانن بدۆێن، بەڵام لە یەکتری حاڵی نابن، چونکە بەکارهێنانی ژیری مێشک، بیردانگی تیژ، شێوەی بیرکردنەوەی قوڵ، توانای لێکدانەوە و وردبینی لە رەوتی رووداوەکانی ناوخۆیی و دەرەکی، بەراوردکردنی ئاستی جیاوازی نێوان ژیان و گوزەرانی چین و توێژەکانی خوارەوەی پلیکانەکەی کۆمەڵگا و گوڵبژێرە فەرمانڕەواکەی هەرێم و هتد…… مەرجن بۆ ئەو کەسانەی کە دەیانەوێ بەرەو خۆشگوزەرانی و ژیانێکی ئارام وبەختەوەر هەنگاو بنێن.
ئەو دۆخەی کە بەرۆکی هەرێمی کوردستانی گرتووە، دۆخێکی ئەوەندە ئاڵۆزۆکاو نیە کە شیرۆڤە و وردبینیەکی قوڵی بیەوێت تا راستی و چەوتیەکانی لە یەکتر جیا بکرێنەوە. تەنیا چاودێرێکی کەم ئەزموونیش دەتوانی زۆر بە ئاسانی کەلێنی نێوان زۆرینەی خەڵکە هەژارەکەی کۆمەڵگا و کەمینە دەوڵەمەندەکەی ببینێت کە چەندە فراوانە و جیاوازیەکەی نێوانیشیان چەندە قوڵە!!
ئەی هۆ و هۆکارەکە بۆچی دەگەڕێتەوە؟
وا بزانم بۆ ئەوە دەگەڕێتەوە کە کاتێک مرۆڤ لە مرۆڤبوونی دەردەکەوێت و دەبێتە ئامرازی دەستی کەسانیتر، ئیدی هەموو هێز و وزەی خۆی بۆ خۆشگوزەرانی و بەختەوەری کەسانی دی دەخاتە گەڕ کە شایستە نین و هیچی بۆی نامێنێتەوە کە بیر لە خۆی و دەوروبەرەکەی بکاتەوە. ئەو جۆرە مرۆڤانە وەک ئامێری ئەلەکترۆنین و بە ریمۆت کۆنتڕۆڵی دەستی کەسانیتر کار دەکەن و بیر دەکەنەوە!!.
ئینجا پرسیارە گەورەکە لێرەدا ئەوەیە:
تا کەی ئەو کەسانە بە زەلیلی لە بەرپرسان دەپاڕێنەوە؟
تا کەی وەکو موریدێکی ئەڵقە لە گوێ لە بەر دەرگای بەرپرسیاران ئێشک دەگرن و دەیانپارێزن؟
تا کەی دەبنە زۆڕنای پرۆپاگندەکردن بۆ گەورە بەرپرسیارەکانیان؟
ئەرێ کەنگی مرۆڤبوونیان دەگەڕێننەوە؟
کەی نایەڵن هیچ کەسێک دەستدرێژی بکاتە سەر دەنگەکانیان؟!
تۆ بڵێی نەزانن کە دەنگ ناسنامەیە، شەرەف و روومەتە!!
دەنگ هاوشێوەی ئیرادە و شکۆ پێوەری رەوشت و ئەخلاقی مرۆڤەکانە، هێزی رۆحیی مەعنەوییانە.
ئیدی کەنگی خاوەندارێتی لە پێودانگە ئەخلاقیەکانیان دەکەن!
تا کەی و کەی و کەی…. لە کەشی توقاندن، دڵەراوکێ، ئاییندەی لێڵ، رۆژی تاریک، تارمایی بێهیوایی و شەوە زەنگی ژیاندا خۆیان مەڵاس دەدەن؟
ئەرێ ئەوەندەی منداڵە پاڵەوانەکەی حیکایەتی پشتەوەی باهۆزی باکووریش وردبینیەکەیان بڕ ناکات و بە دوای چارەنووسی بەختەوەرییاندا بگەڕێن! تەم و مژی دەیان ساڵی رابردوو بڕەوێننەوە! بە عەقل وبیرکردنەوەی خۆیان بڕیار لە سەر چارەنووسی خۆیان بدەن، نەک بە ریمۆت کۆنتڕۆڵی ئاغاکانیان!
شانسیان هەیە کە دەرفەتێکی زێڕین لە پێشیانە. ئەمەش تاقیکردنەوەیەکی چارەنووسسازە. دوای کەمتر لە یەک هەفتە هەڵبژاردنی ئیراقە و دەتوانن خۆیان تاقی بکەنەوە کە چەندە شانازی بە خۆیانەوە دەکەن؟ یان چەندە بڕوایی بە خۆیانە بۆ ئەوەی کار بۆ خۆیان بکەن و بڕیارەکەشیان لە دەست خۆیانە؟ یاخود تەنیا کار بۆ ئەو کەسانە دەکەن کە بە دەنگی ئەوان پلە و پۆست و پول و پارە و کۆشک و ژیانێکی شاهانە بۆ خۆیان دەستەبەر دەکەن!!!
