لێدوانە جەنجاڵییەکانی دۆناڵد ترامپ سەبارەت بە “داگیرکردنی غەزە” و گواستنەوەی دانیشتووانەکەی، کاردانەوەی بەرفراوانی لە کۆڕە سیاسییەکانی ئەمریکادا لێکەوتەوە
لێدوانە جەنجاڵییەکانی دۆناڵد ترامپ سەبارەت بە “داگیرکردنی غەزە” و گواستنەوەی دانیشتووانەکەی، کاردانەوەی بەرفراوانی لە کۆڕە سیاسییەکانی ئەمریکادا لێکەوتەوە. بەرپرسانی کۆشکی سپی و وەزارەتی دەرەوە هەوڵ دەدەن بە ڕەواندنەوەی وتەکانی ترامپ، پێش بە پەرەسەندنی ڕەخنەکان بگرن.
کارۆلین لێڤیت، وتەبێژی کۆشکی سپی، لە کۆنگرەیەکی ڕۆژنامەوانیدا ڕایگەیاند: “هیچ بڕیارێکی کۆتایی بۆ ناردنی هێزی سەربازیی ئەمریکا بۆ غەزە نەدراوە”. ئەو هەروەها جەختی کردەوە: “تێچووی ئاوەدانکردنەوەی غەزە لە گیرفانی باجدەرانی ئەمریکایی نادرێت. بەڕێز ترامپ لەگەڵ هاوبەشە هەرێمییەکان ڕێک دەکەوێت”.
لێڤیت لە وەڵامدانەوە بە پرسیاری ڕۆژنامەنووسان سەبارەت بە وردەکارییەکانی پلانی گواستنەوەی فەلەستینییەکان و چۆنیەتی گەڕانەوەیان خۆی بوارد و تەنیا وتی: “ئامانجی ئێمە دروستکردنی هەلومەرجی گونجاوە بۆ ژیان لە غەزە”.
مارکۆ ڕۆبیۆ، وەزیری دەرەوەی ئەمریکا، لە سەردانێکی گواتیمالادا هەوڵی دا زمانێکی نەرمتر بەکار بهێنێت. ئەو وتی: “مەبەستی سەرۆک کۆمار، دەرکردنی هەمیشەیی فەلەستینییەکان نییە. ئامانجی سەرەکی، دروستکردنی ژینگەیەکی ئارامە بۆ گەڕانەوەیان”. ڕۆبیۆ پلانی ترامپی وەک “پێشنیارێکی دڵفراوانانە” وەسف کرد، بەڵام نەیتوانی ڕوونی بکاتەوە چۆن وڵاتانی دراوسێ کە پێشتر ناڕەزایەتی خۆیان دەربڕیوە، هاوکاری ئەم پلانە دەکەن.
سیناتۆر کریس مۆرفی، ئەندامی دیموکراتی کۆنگرە، ئەم پلانەی بە “نامەنتیقی” ناو برد و هۆشداری دا: “بوونی هێزەکانی ئەمریکا لە غەزە، ئاسایشی سەربازەکانمان دەخاتە مەترسییەوە”.
سیناتۆر کریس ڤان هۆڵن، بە ئاماژە بە یاسا نێودەوڵەتییەکان وتی: “ئەم پلانە پێشێلکردنی ئاشکرای پەیماننامەکانی ژنێڤە و دەبێت مەحکووم بکرێت”.
لە بەرامبەردا، هەندێک نوێنەری کۆماریخواز وەک سیناتۆر لیندسی گراهام پێشوازییان لەم پلانە کرد و بە “چارەسەرێکی داهێنەرانە” یان ناو برد.
دۆناڵد ترامپ لە لێدوانێکی جەنجاڵیدا باسی لە “کۆنترۆڵی درێژخایەنی ئەمریکا بەسەر غەزە” کرد. ئەم لێدوانە کاردانەوەی بەرفراوانی لە ناوەندە سیاسییەکانی ئەمریکا لێکەوتەوە.
