پشتیوانی پلاتفورم یارسان لە مانگرتن گشتی ڕووژهەڵات کوردستان

پلاتفورم یارسان لە بەیانیەییگ سەربار مەحکوم کردن سزای ئێعدام پەخشان عەزیزی و وریشە مورادی پشتیوانی خوەی لە مانگرتن گشتی ڕووژهەڵات کوردستان ئێلام کرد.

لە بەیانیەگەی پلاتفورم یارسان هاتیە، پەخشان و وریشە وە تێکوشانیان دژ وە زوڵم و ستەم نمایەندگی هاوار ئازادیخوازانە لە جوغرافیای سیاسی ئێرانن.

ئەوان نە تەنیا وە جور ژنەیل تێکوشەر بەلکو وە جور نمایەندەی ئرادەی گەل کورد و گەلان ئێران ئیسە لە خەتەر ئێعدام قەرار گرتنە.

پلاتفورم یارسان وە ئێلام ئیە ک تێکوشان و موبارزەی پەخشان و وریشە موبارزەی شەخسی نیە جەخت کردیە ک نزام سەرکوتگەر و دیکتاتور لە وەرانوەر بەرخوەدان گشتی گەل دەوام ناتیەرێ.

پلاتفورم یارسان جەخت کردیە ئیمە سەربار خاوەنداری لە پەخشان و وریشە و پشتیوانی لە مانگرتن سەرانسەری ڕووژ چوارشەمە سێ ڕێبەندان کەیم و داوا لە رای گشتی کەیم لەی مانگرتنە بەشداری بکەن.