ئیمانوێل ماکرۆن، جەختی لەسەر پشتگیری هاوپەیمانە کوردەکان لە خەبات دژی تیرۆریزم کردەوە. بەڵێنی دا کە بە “شەڕڤانانی ئازادی کوردەکان وەفادار بمێنێتەوە
ئیمانوێل ماکرۆن، سەرۆک کۆماری فەرەنسا، ڕۆژی دووشەممە ١٧ی بەفرانبار لە کۆنفرانسی باڵیۆزەکانی ئەم وڵاتە لە پاریس داوای ڕوانینێکی واقیعبینانەی بۆ گۆڕانکارییەکانی دوایی سووریا کرد و جەختی لەسەر پشتگیری هاوپەیمانە کوردەکان لە خەبات دژی تیرۆریزم کردەوە.
سەرۆک کۆماری فەرەنسا ڕایگەیاند کە وڵاتەکەی لە درێژخایەندا پشتگیری لە پرۆسەی گواستنەوە بەرەو “سووریایەکی سەربەخۆ، ئازاد و ڕێزگر لە فرەچەشنی ئیتنیکی، سیاسی و ئایینی” دەکات. ماکرۆن هەروەها بەڵێنی دا کە بە “شەڕڤانانی ئازادی وەک کوردەکان” کە دژی تیرۆریزم و بەتایبەت داعش دەجەنگن، وەفادار بمێنێتەوە.
ئەم لێدوانانەی ماکرۆن لە دوای گۆڕانکارییەکانی دوایی سوریا و دەرچوونی بەشار ئەسەد لە دەسەڵات هاتووە. سەرۆک کۆماری فەرەنسا بە جەختکردنەوە لەسەر پێویستی ڕوانینێکی واقیعبینانە بۆ ئەم گۆڕانکارییانە، داوای پشتگیری لە پرۆسەی گواستنەوەی سیاسی لەم وڵاتە کرد. ئەو گرنگی پاراستنی سەقامگیری و بەرەنگاربوونەوەی هەڕەشە تیرۆریستییەکانی لە سەردەمی دوای ئەسەد دووپات کردەوە.
فەرەنسا لە سەرەتای قەیرانی سوریا لە ساڵی ٢٠١١ـەوە پشتگیری لە ئۆپۆزیسیۆنی ئەسەد کردووە و ڕۆڵێکی چالاکی لە هاوپەیمانێتی نێودەوڵەتی دژی داعش هەبووە. پاریس هەمیشە جەختی لەسەر پێویستی گواستنەوەی دەسەڵاتی سیاسی لە سوریا کردووەتەوە و پشتگیری لە هێزە دیموکراتیکەکانی سوریا کردووە.
لە ڕاپۆرتێکی فەرەنسیدا هاتووە کە ماکرۆن لە وتارەکەیدا گوتی: “ئێمە دەبێت بە شێوەیەکی ستراتیژی بیر لە داهاتووی سوریا بکەینەوە و پشتگیری لە هاوپەیمانە کوردەکانمان بکەین کە ڕۆڵێکی گرنگیان لە شکستی داعش هەبووە.” هەروەها ئاماژەی بەوە کرد کە فەرەنسا بەردەوام دەبێت لە هاوکاری مرۆیی و پەرەپێدانی ناوچە ئازادکراوەکانی سوریا.
لە ئاریان تیڤی وەرگیراوە
