شەهیدانى باشوور لەناو ڕیزەکانى پەکەکەدا
ڕۆژ نیوز
بەرخۆدان و شەهیدبوونی دەیان هەزار گەریلای بەشەكانی كوردستان لەناو ڕیزەكانی گەریلاكانی ئازادیی كوردستاندا، ئەو دەنگۆیانە بەدرۆدەخەنەوە، كە دەڵێن: “پەكەكە تەنها پارتێكی باكووری كوردستانە”، هەروەها شەهیدبوونی زیاتر لە هەزار گەریلای خەڵكی باشووری كوردستانيش بەڵگەن لەسەر ئەوەی هەموو شوێنێكی كوردستان مەیدانی تێکۆشانە بۆ پەكەكە.
پەکەکە لە سەرەتای دامەزراندنییەوە وەک تەڤگەرێکی ئازادییخوازیی، کۆمەڵایەتیی، ژینگەیی و بیردۆزیی بۆ هەموو بەشەکانی کوردستان و کوردێک لە هەر شوێنێکی جیهان بێت دامەزراوە و لە پێناو ئەوانەشدا دەیان هەزار شەهیدی بە ڕێگای ئازادیی بەخشییوە، بێگومان هاوشێوەی پارچەکانی دیکەی کوردستان، بەشێک لەو شەهیدانەش لە باشووری کوردستانەوە بەشداریی ناو ئەو تەڤگەرەبوون و گیانی خۆیان بەختکردووە، لەم دۆسییەیەدا باس لە تێکۆشانی شەهیدانی باشووری کوردستان لەناو ڕێزەکانی پەکەکەدا دەکەین.
تێکۆشانی ژنان و گەنجانی باشووری کوردستان، لەناو ڕیزەکانی گەریلادا لەپێناو دۆزی ڕەوای گەلی کورد لە هەر چوار بەشی وڵاتدا، پێگە و جێگەیەكی بەرفراوانی هەیە و مێژووی پڕ لە بەرخۆدانی پەكەكە بەشێكی بە خوێنی ژنان و گەنجانی گەریلای باشووری كوردستان نووسراوەتەوە.
بەپێی ئامارێکى کۆمیتەی خانەوادەی شەهیدانی پەکەکە لە باشوور، تا ئێستا زیاتر لە هەزار گەریلاى باشووری كوردستان لە پێناو پاراستنی خاک و نیشتیماندا شەهیدبوون، بەشێکیان هێڵی خیانەت چاوساغ و هاوکاری دەوڵەتی تورک هۆکاری شەهیدکردنیان بووە، لەو ژمارەیەش زیاتر لە ٧٠ ژن پێشەنگایەتی ئەو تێکۆشانەیان کردووە و بۆ پێکهێنانی ئامانجەکانی پەکەکە بۆ ئازادیی و گەلی کورد و ژنان شەهیدبوون.
بەشێک لە شەهیدانی باشووری کوردستان لەنێو ڕیزەکانی پەکەکە
کاتێک گەریلاکانی ئازادیی پەکەکە ڕوو لە باشووری کوردستان دەکەن، یەکەم وڵاتپارێز کە پێشوازییان لێدەکات، شەهید سادی عومەر “سادق سندی” کە خەڵکی زاخۆیە، بوو، بە پێشوازییەکەی دەبێتە هاوکارێکی مەعنەویی گەورە بۆ پاڵپشتییکردنی گەریلا و دەستپێکردنی خەباتی چەکداریی، دواتر لە ساڵی ١٩٩١ لە ناوچەی بادینانی سەربە پارێزگای دهۆک لە لایەن پەدەکەوە شەهید دەکرێت.
هەروەها دوای ئەوەی شەهید کاوە عەلی ساڵح ناسراو بە دکتۆر سیروان، لە ساڵی ١٩٨٤ دەستبەرداری کۆمەڵەی ڕەنجدەران دەبێت و ڕوو دەکاتە وڵاتی دانیمارک، بە ماوەیەکی کەم ئاشنای فکری ئاپۆیی دەبێت و لە ساڵی ١٩٨٩ دەچێتە ئەکادیمیای ناوەندی ‘مەعسووم کۆرکماز’ لە دۆڵی بیقاع لە لوبنان و چاوی بە ڕێبەری گەلی کورد عەبدوڵا ئۆجالان دەکەوێت و خولێکی پەروەردەیی دەبینێت، لە پاش تەواوکردنی خولەکەی دەگەڕێتەوە کوردستان و لە باکووری کوردستان و لە ڕیزەکانی گەریلادا بەشداری شەڕی دژ بە دەوڵەتی داگیرکەری تورک دەبێت.
دوای خیانەتی ٣١ـی ئابی ١٩٩٦ و کشانەوەی هێزەکانی یەنەکە لە سنوورەکانی هەولێر و سلێمانییەوە بەرەو ناوچە سنوورییەکانی ئێران، شەهید سیروان و ژمارەیەک لە هەڤاڵانی لە چەمی ڕەزان جێگیردەبن، هێزەکانی پەدەکە گەمارۆیان دەدەن و خۆی و چوار هەڤاڵی بەناوەکانی: حاجی قامیشلۆیی، بابان، دیار مێردین و عەگید گەرمیانی شەهید کرد.
هاوکات یەکێکی دیکە لە پێشەنگەکانی باشووری کوردستان دیار غەریب ناسراو بە شەهید هەڵمەت گابارە، کە لە ساڵی ١٩٩٥ بەشداریی لە ڕیزەکانی گەریلادا دەکات و لە ١٩٩٧ لەگەڵ پۆلێک لە هەڤاڵانییدا لە شام چاوی بە ڕێبەر ئاپۆ دەکەوێت و پەروەردەیەکی چڕوپڕی ئایدۆلۆژیی و فیکریی دەبینێت، شەهید هەڵمەت هێندە لە بواری پراکتیک و فکرییدا بەپێی پرەنسیپەکانی گەریلایی خۆی پێشدەخات، دواجار دەبێت بە ئەندامی کۆنسەی بەڕێوەبەریی کۆما جڤاکێن کوردستان-کەجەکە، دواجاریش لە ٢٠١٩ دەستی خیانەت و دەوڵەتی داگیرکەری تورک دەگاتە هەڤاڵ هەڵمەت و دوو لە هەڤاڵانی و لە بناری قەندیل شەهید دەبێت.
بێگومان گەر هەموو شەهیدانی باشووری کوردستان لەنێو ڕیزەکانی پەکەکەدا یادبکەینەوە ئەوا پێویستیمان بە دەیان دۆسییەی هاوشێوە دەبێت، کە بە خوێن و ڕۆحی خۆیان بوون بە بەشێک لە تێکۆشانی ئازادیی پەکەکە بۆ کوردستان، لە نموونەی ئەوانەش شەهیدان (ڤیان جاف، هەڵمەت دێرەلووک، بەفرین ڕێباز، دەستینا قەندیل، پڵنگ گەرمیانی و زیاد لە هەزار شەهیدی دیکەن).
قۆناغەکانی بەشداربوونی گەنجانی باشوور بۆ ناو ڕیزەکانی گەریلا
دوای دەستپێکردنی خەباتی چەکداریی لە ١٩٨٤ پەکەکە لەناو گەلدا زیاتر دەناسرێت و لەو ماوەیەدا بە دەیان گەنج لە باشووری کوردستانەوە پەیوەندی بە ڕیزەکانی گەریلاوە دەکەن، دواتر لە ساڵی ١٩٨٨ بۆیەکەمجار بە شێوازی گرووپ، بە پێشەنگایەتی شەهید زێرەڤان و شەهید جوتکار، گرووپێکی گەنجانی باشووری کوردستان کە لە هەشت کەس پێکدێن ڕوودەکەنە چیا ئازادەکان و بەشداری ناو ڕیزەکانی گەریلا دەبن.
لە ساڵی ١٩٩١ تا ١٩٩٣ یەکەم شەپۆلی فراوان لە بەشداربوونی ژنان و گەنجانی باشووری کوردستان بۆ ناو ڕیزەکانی گەریلا دەستپێدەکات، ئەمەش زیاتر لە ژێرکاریگەریی دامەزراندنی (پارتی ئازادیی کوردستان-پاک)ـدا دەبێت، کە شەهید دکتۆر سیروان، یەکێک لە دامەزرێنەرانی دەبێت.
شەپۆلی دووەم لە نێوان ساڵانی ١٩٩٦ تا ١٩٩٧دەبێت، ئەمەش لەژێر کاریگەریی دامەزراندنی ڕێکخراوی ‘یەکێتی نەتەوەیی دیموکراتی کوردستان’ کە شەهید دکتۆر سیروان تا شەهیدبوونی سکرتێری ئەو ڕێکخراوە دەبێت.
جارێکی دیکە لە ساڵی ١٩٩٩ لە دوای گەلەکۆمەی نێودەوڵەتی لەسەر ڕێبەری گەلی کورد عەبدوڵا ئۆجالان، ژنان و گەنجانی باشووری کوردستان بە بەشدارییان لەناو ڕیزەکانی تێکۆشانی گەریلادا وەڵامی ئەو پیلانگێڕییەیان دایەوە.
لە دوای ڕووخانی ڕژێمی عێراق (بەعس)، ساڵی ٢٠٠٣ گەلی کورد لە باشووری کوردستان هەستیان بە ئازادیی دەکرد و ڕۆحیی نەتەوەییان لە لوتکەدابوو، هەر بۆیە بە ڕۆحی یەکپارچەیی کوردستان، ڕوویان لە چیا ئازادەکان کرد و لەناو ڕیزەکانی گەریلا دەستیان بە خەبات کرد.
٢٠٠٦ تا ٢٠٠٧ بە شەپۆلێکی دیکە لە بەشداربوونی لاوان هەژماردەکرێت
لە کۆتا وێستگەشدا، لە نێوان ساڵانی ٢٠١٣ تا ٢٠١٦ لە کاتی هێرشی گرووپە چەتەکانی داعش بۆسەر باشووری کوردستان و لەوکاتەدا بەهاناوەهاتنی گەریلا بۆ پاراستنی باشووری کوردستان، کچان و کوڕانی باشووری کوردستان کاریگەردەبن بە تێکۆشانی گەریلا و لە تەواوی شار و شارۆچکەکانەوە بە لێشاو ڕوو لە چیا ئازادەکان دەکەن و دەبنە بەشێک لەو تێکۆشانە.
هەرچەندە هێڵی خیانەت لە چوارچێوەی شەڕی تایبەتدا وا باس دەکەن کە گۆرەپانی تێکۆشانی پەکەکە تەنها باکووری کوردستانە، بەڵام بەشداریی گەنجانی باشووری کوردستان لە ڕیزەکانی گەریلا و تێکۆشان تا شەهیدبوون لە هەموو پارچەکانی دیکەی کوردستان و تەنانەت لە شەڕی دژی داعش و دەوڵەتی داگیرکەری تورک لە باشووری کوردستان ئەوا هەموو ئەو پڕوپاگەندە و بانگەشانە تێکدەشکێنێت و جارێکی دیکە شەهیدان بە خوێنی خۆیان دووپاتی دەکەنەوە کە پەکەکە بۆ هەموو کوردستانە.
