خاوەن نانەواخانەکانی هەولێر دەستیان بە مانگرتن کرد

خاوەن نانەواخانەکانی شاری هەولێر، بەهۆی ئەو فشارەی دەکرێتەسەریان مانیان لەکارکردن راگەیاند و نەچوونە سەرکارەکانیان و بەیاننامەیەکیشایان ئاڕاستەی مەسرور بارزانیی کرد.

ئەمڕۆ چوارشەممە، خاوەن نانەواخانەکانی شاری هەولێر بەیاننامەیەکیان ئاڕاستەی مەسرور بارزانیی سەرۆکی حکومەتی کاربەرێکەر کرد و تیایدا هاتووە، “بەرپرسانی هەولێر بۆ پابەند بوون بە بڕیاری هەرزانکردنی نانەوە بەناوی مەسرور بارزانیی سەرۆکی حکومەتی کاربەرێکەرەوە هەڕەشەمان لێدەکەن.”

ئەوەشیان خستووەتەڕوو، بەهۆی ئەو هەموو فشارەی لەسەریانە و دەست خراوەتە گیرفانیان، ئەمڕۆ ٦١٠ نانەواخانەی هەولێر نەگەڕاونەتەوە سەر کارەکانیان و هەزار و ٨٣٠ کەسیش بێکار بوون.

خاوەن نانەواکانی شاری هەولێر ئەوەشیان راگەیاندوە، “بەهۆی بڕیارەکەی حکومەتەوە دەبێت پێشێڵی یاسا بکەین، چونکە ئەگەر فرۆشتنی نان بەو نرخە بێت، دەبێت کرێکارەکانمان دەربكەین و كرێكاری بیانی بهێنن بۆ شوێنەكانیان، کە ئەمەش پێشێلی یاسای كار و دەستەبەری كۆمەڵایەتییە.”