رۆژی جیهانیی پشتوانیی کۆبانی پیرۆزبێت

رۆژی جیهانیی پشتیوانیی کۆبانی و هەژانی ویژدانی کۆمەڵگەی مرۆڤایەتیی، بوو بەدەستپێکی هەنگاوە بەریاییەکانی سەرکەوتن بەسەر شەمشەمەکوێرەکانی سەردەمدا.

لەیادی رۆژی جیهانیی کۆبانیدا، کە چەخماخەی هەنگاوە بەراییەکانی سەرکەوتنە مەزنەکەیە، بەسەر چەتەکانی داعش دا، لە شەخسی شەهیدان ئارین میرکان و هەڤاڵ موسا سەری بەرزمان لە ئاست شەهامەت و مەقامی بڵندی شەهیدانی بەرخۆدانی داستانی کۆبانی و تەواوی شەهیدانی رۆژئاوای کوردستان دادەنەوێنین، سڵاو لە هەموو ئەو جەنگاوەرانەی لە پێشبڕکێی مەرگدا بوون بۆ پاراستنی کۆبانی و خاکی پیرۆزی کوردستان، ئەمڕۆ یادێکی مەزنە بۆ کورد و هەموو مرۆڤایەتیی و چرکەساتی تێک شکاندنی ئەفسانەی لە شکاننەهاتووی بەربەرییە هاوچەرخەکانی داعشە لەسەر دەستی نەوەکانی ئۆجاخی هۆریت، بێگومان شکستی چەتەکانی داعش لە کۆبانی بووە دەستپێکی کۆتایی خەلافەتی ترس و تیرۆر و کوشتن، ئەو تێکۆشانە میتۆلۆژییەی لە کۆبانی بەڕێوەچوو ئەنجامی بەرخودانی بەشکۆی ئیمرالییە، چرکەساتی لەمەحەکدانی پێوانەی ئاستی ئیرادەی گەلی کوردە کە مەودای خاڵی سفر دەکاتەوە و دەیگەیەنێت بە خاڵی کۆتایی و لوتکەی ئیرادە، لەم خاڵەدا هەموو نایەکان دەبن بە ئا ناکرێت، نابێت، دەچەرخێت بۆ دەبێت و دەکرێت، ڕۆڵی ژنانی کورد لەمەیدانی کرداریدا، بوو بەوانەیەکی مێژوویی مەزن و تێگەیەکی مێژوویی دروست کرد کە تەواوی تابۆ و ترادیشنە کۆنەکانی قڵپ کردەوە و لەڕیشەوە هەڵیتەکاندن.

هاوکات سەرکەوتنی کۆبانی بە پێشەنگایەتیی ژنان، ئەم ڕەگەزەی کرد بە سمبوڵی چەرخی مۆدێرنی ئازادیی مرۆڤایەتیی، پیرەمێردی شاعیر راستیکرد کە گوتی، لاوان بەعیشقەوە دەچن بەرەو پییری مەرگەوە. لەبن سیوانی هەستە مەجازییە جوانەکەی پیرەمێردو فەلسەفەی پییری مەزندا شاگردەکانی ئازادیی وایانکرد، کە دۆژمن شکست لەدوای شکت، خۆی نەگرێت و تاوەکو سەرکەوتنی کۆتایی لە هۆڵ کچان و کوڕانی رۆژائاوا بە دەستی خۆیان، کۆتایی قۆناغێک و لەدایک بوونی قۆناغێکی نوێ لە ناو لاپەڕە درەوشاوەکانی مێژووی مرۆڤایەتییدا بەخوێنی گەشی خۆیان بنووسنەوە، لێرەوە سەرنج دەدەینە سەر خاڵێکی گرنگ لەم قۆناغەدا، هاتنی گەریلاکانی ئازادیی بۆ شەنگال، کەرکوک، مەخمور، هەولێر و پاراستنی هەرێمی کوردستان، هاوکات چوونی پۆلێک لە پێشمەرگەی قارەمان بۆ کۆبانی و بەرگریی کردنیان لە ڕۆژئاوای کوردستان لە سەختتریین و دژوارتریین ساتەوەختی مێژووییدا، خاڵی بە هێزی ئەم قۆناغەیە هەروەها تێکەڵ بوونی خوێنی خوشک و براکان لە سەنگەری بەرگریی شەرەف و کەرامەتدا، واتای خاڵی وەرچەرخانە لە خەباتی بزوتنەوەی ئازادیی و نەتەوایەتییدا، بەرگری پێشمەرگە قارەمانەکانمان شانبەشانی خوشک و براکانمان لەیەک سەنگەردا، بەدەست هێنانی ناسنامەی شەرەفە.

هەر بۆیە پێویستە برا پێشمەرگەکانمان پارێزگاریی لە ناسنامە(شەرەف و شکۆی)خۆیان بکەن و نەچنە ژێرکاریگەریی و باری هیچ بڕیارێکی سیاسیی کە حیزبێکی کلاسیک یان بنەماڵەیەک زۆر چاو قایمانە تاک لایەنە دەیدات، بەبێ ئەوەی بەرژەوەندیی گەلەکەمان لەبەر چاو بگرێت لە پێناو بەرژەوەندیی تەسکی بنەماڵەییدا، لەکاتێکدا بنەماڵەی بارزانیی چاشایەتیی خۆیان نەشاردۆتەوە، بە گرینگییەوە ئاماژەی بۆ دەکەین داستانی کۆبانی وانەێکی فێرکردین، کە برا لەپشت برابێت و ئیرادەی بەرخۆدان هەبێت، هیچ کات دوژمن ناتوانێ پنتێک لە خاکی کوردستان داگیربکات، لێرەشەوە تێدەگەین ئەگەر گەلەکەمان هێزی خۆی کۆبکاتەوە تواناکانی بەئاستێک دەگات ڕووبەڕووی هەموو تەحەدیاتەکان ببێتەوە، بۆیە کاری هەرە پییرۆز یەکێتیی و یەکبوونە، کۆکردنەوەی هێزە چەکدارەکانە لە کۆنسەیەکی سەربازییدا، لە کاتێکدا کە دەزانین مەترسییەکان لەئێستادا کەمتر نین لەسەر گەلەکەمان بە بەراورد لەگەڵ ئەو قۆناغە، بەتایبەت لەسەر باشور و باکوور و رۆژئاوای کوردستان، سەر وەختێک کۆبانی وەک ستالینگرادی مۆدێرن(ڕەمزی بەرگری ڕەوا) ناوی بوو بووە وێردی سەرزمانی هەموو کەسێک، تەنانەت وەک فریادڕەسی کۆمەڵگەی بەشەرییەت ناودەبرا دژی بەربەریەت و شەمشەمە کۆێرەکانی تاریکی، لە ئێستادا جیهان لە بەرامبەر هێرشەکانی دەوڵەتی فاشستی تورکیادا بێدەنگە، هەر لە وێرانکردنی ژێرخانی ئابووریی ڕۆژئاوای کوردستان و هێرش کردنە سەر پێگەکانی ژیان و ناوەندە خزمەت گوزاریی و مەدەنییەکان، تا شەهیدکردنی پییرێکی حەفتا ساڵ و منداڵێکی ناو بێشکە، لە کاتێکدا تورکیا هەتا توانی لەو قۆناغەدا هاوکاریی داعشی کرد دژی مرۆڤایەتیی.

هاوکات پێوستە جیهان بەردەوام بێت لە خاوەندارییکردن لە دەستکەوتەکانی باکوور رۆژهەڵاتی سوریا کەدەستکەوتی گەردونیین و بە تەنیا بەجێنەهێلدرێت لەبەردەم هێرشە بەربەرییەکانی دەوڵەتی فاشیستی تورکیا، گەلەکەمان بەرۆحی کۆبانی ئەمڕۆ گەلەکەمان دەست لەناو دەست یەکبگرێت و پێشەنگایەتیی تێکۆشانی ئازادیی و دیموکراسیی بۆ هەموو گەلانی ناوچەکە بکات، تاکو جارێکی تر تیرۆریستانی داعش و نەتەوەپەرستانی ناوچەکە بەناوی ئایین و دەوڵەت-نەتەوەوە(خوداوەندە شومەکەی مۆدێرنێتە)چیتر نەفرەتی خۆیان وەک فەڕ نەڕێژن لەناوچەکەدا و گەلی کورد و گەلانی ناوچەکە پاڵ پێوەنەنێن بۆ ئەوشەڕە نەفرەت لێکراوەی کە هەرگیز کۆمەڵگەو گەلان تێدا براوە و سودمەند نین، پێویستە ئەم نەزیفە کۆمەڵایەتیی و سیاسییە بوەستێنرێت، عەقڵیەتی سیستەمی هەژمونگەرا و دەوڵەت-نەتەوە بەتایبەتیی گیانەوەرە دڕندەکە(ڕۆحی ناسیۆنالیزم، تەعەسوبی تائیفی و دیینیی) ئەگەر ئەوسار-جڵەو نەکرێت شەڕی دژوارتر و خوێناویی تر لەناوچەکەدا ڕوو دەدات، وەک ئەوەی ئێستا لەنێوان حەماس و ئیسرائیل لە ئارادایە کە وەک بەرداشی هاوچەرخ کۆمەڵگە دەهاڕن.

ئێمە وەکو تەڤگەری ئازادیی دووپاتی دەکەینەوە و بانگ لە هەرکەس و لایەنێک دەکەین، کە فەلسەفەی نەتەوەی دیموکرات تاکە چارەسەرە بۆ هەموو قەیرانەکانی رۆژهەڵاتی ناوین و هەموو جیهان، بەم پێیە سیستەمی خۆبەرێوەبەریی دیموکراتیی هەوێنی ئاشتیی و برایەتیی گەلان و ئایینەکانی ناوچەکەیە، هاوکات یەک ریزیی و تەبایی نێوان لایەنە سیاسییەکانی کوردستان زامنی پاراستن و مانەوەی گەلەکەمانە، دەباهەموومان ئەم فیکر و پارادایمە بکەین بە پەیڕەوی ژیانمان لە پێناو ژیانێکی شایستە بە مرۆڤ و بەرقەرارکردنی ئاشتیی لەماڵەوە و ئاشتیی لە جیهاندا..

بژی بەرخۆدانی کۆبانی

بژی ئیرادەی ئازادیی گەلی رۆژئاوای کوردستان

بژی پێشمەرگە، بژی شەرڤان، بژی گەریلا

شەهید نامرن

دەستەی بەرێوەبەرایەتیی

تەڤگەری ئازادیی کۆمەڵگەی کوردستان