کۆمپانیای تویتەر ڕایگەیاند، لەماوەی هەڵمەتی بانگەشەی هەڵبژاردنەکانی ١٤ی ئایار لەسەر داواکاری دەسەڵات، هەژماری تایبەت و بڵاوکراوەیەکیان سنووردار کردووە.
شەوی ڕابردوو، بەشی “تویتەر بۆ کاروباری حکومەتی وڵاتانی جیهان” بڵاویکردەوە، ماوەی هەفتەیەکە لەلایەن حکومەتی تورکیاوە بە نووسراوی فەرمی دادگا داوامان لێکراوە خزمەتگوزارییەکانی تویتەر سنووردار بکەین، لە ئەنجامیشدا چوار هەژماریان داخستووە و ٤٠٩ بڵاوکراوەشیان سڕیوەتەوە.
هەرچەندە کۆمپانیاکە ئاماژەی بەوە کردووە، کە نیگەرانی خۆیان بەرامبەر ئەو داخوازییەی حکومەتی تورکیا نیشان داوە، بەوەی کە سنووردارکردنی ئازادی ڕادەربڕینە، بەڵام داواکەشیان ڕەتنەکردووەتەوە و بەخواستی دەسەڵاتی فاشیستی تورکیا مامەڵەیان کردووە.
پاساوی تویتەریش بۆ جێبەجێکردنی ئەو داواکارییە ناڕەوایە، تەنها ئەوەیە لە یاسای کارکردنی تویتەردا، دەبێت کۆمپانیاکە بەپێی خواستی حکومەتی وڵاتان کار بکات و سەرجەم داواکارییەکانیان جێبەجێ بکات، بە پێچەوانەوە حکومەتی وڵاتەکە دەتوانێت بەکارهێنانی خزمەتگوزارییەکانی تویتەر لە وڵاتدا قەدەغە بکات.
