هاوسەرۆکى نوێنەرایەتی هەدەپە لە هەرێمی کوردستان: ڕێگری لە هاتنی پەرلەمانتاری هەدەپە حەسەن ئۆزگونس بۆ هەرێمی کوردستان بە بڕیارێکی سیاسی ناوی برد
هاوسەرۆکى نوێنەرایەتی هەدەپە لە هەرێمی کوردستان ڕایگەیاند، پەدەکە لە فڕۆکەخانەى هەولێر ڕێگری لە هاتنى پەرلەمانتارێکی هەدەپە کرد بێتە باشوری کوردستان، ئەوەش بڕیارێکی تەواو سیاسییە کە لەلایەن پەدەکەوە دراوە و پەیوەندی بە عێراقەوە نییە.
ناهید ئارمیش هاوسەرۆکی نوێنەرایەتى هەدەپە لە هەرێمی کوردستان سەبارەت بە ڕێگری لە هاتنی پەرلەمانتاری هەدەپە حەسەن ئۆزگونس بۆ هەرێمی کوردستان بە بڕیارێکی سیاسی ناوی برد و ڕایگەیاند: ئەوەندەی ئێمە لێکۆڵینەوەمان کردووە، عێراق ناتوانێت ڕێگری لە هاتنی کەسانی فەرمی بکات بۆ ناو هەرێمی کوردستان، تەنانەت ئەگەر بڕیار بدات، لێرە دەسەڵاتێکی بەڕێوەبەری کوردی هەیە و جێبەجێ ناکرێت.
ناهیدە ئارمیش وتیشی: پەرلەمانتاری ئێمە لەسەر داوای ڕۆشنبیران و چالاکوانان له باشوری کوردستان هاتووە، بۆ ئەوەش هیچ بەربەستێکی یاسایی لەبەردەم ئەودا نەبووە، بەڵام بەڕێوەبەرایەتی پەدەکە لە فڕۆکەخانەی هەولێر بە بڕیارێکی سیاسی ڕێگرییان لێکرد و نەیانهێشت بێتە ناو هەرێمەوە کە بۆ هەڵمەتی هەڵبژاردنی پارتی چەپی سەوز و ویستى بەشداری لە چالاکییەکان بکات.
هاوسەرۆکى نوێنەرایەتى هەدەپە لە هەرێم ئاماژەى بەوەشکردوە، هەوڵێکی زۆریان دا کە پەرلەمانتارەکەیان لە ڕێگەی دیپلۆماسیی و پەیوەندییەکانیانەوە بچێتە ناو عێراق و لەوێوەوە بێتەوە ناو هەرێمی کوردستان، بەڵام پەدەکە بەبیانووی ئەوەى حکومەتی فیدراڵی بڕیاری قەدەغەکردنی هاتنیان داوە، ڕێگەیان پێنەدا بچێتە عێراق.
ئارمیش وتیشی: ئێمە پێمانڕاگەیاندون کە هیچ مەرجێکی لەو شێوەیە نییە بۆ ئەوەی هیچ دامەزراوەیەک یان کەسێک ڕێگە لە پەرلەمانتار بگرێت، ئێمە پەرلەمانتارەکانمان حەسانەیان و دەتوانن بە شێوەیەکی فەرمی سەردانی هەرێم بکەن وەک بەشێک لە بەرنامەکەیان هەر کاتێک بیانەوێت.
بڕیار بوو ئەمڕۆ و ڕۆژانى داهاتوو لە چەند ناوچەیەکى هەرێمی کوردستان چالاکی پشتیوانى بۆ پشتگیری لە پارتى چەپی سەوز بەرێوە بچێت و لەسەر داوای ژمارەیەک رۆشنبیر و کەسایەتیش بانگهێشتى حەسەن ئۆزگونس، پەرلەمانتاری هەدەپەیان کرد بوو، بەڵام ئەمڕۆ لەلایەن هێزە ئەمنیەکانى پەدەکەوە لە فرۆکەخانەى هەولێر ڕێگری لێکرا بێتە هەرێم.
