لە بێرمینگام یادی سەردەشت عوسمان بەرز ڕاگیرا
بەهرۆز حسێن
دوێنێ هەینی ٥ی ئایاری ٢٠٢٣ شاری بێرمینگام لە وڵاتی بەریتانیا یادی تیرۆرکردنی شەهیدی قەڵەم ڕۆژنامەنووس سەردەشت عوسمان کرایەوە. یادەکە لە سەنتەری شارەکەدا و بە ئامادەبوونی چەندین چالاکوان و مرۆڤی ئازادیخواز بەڕێوەچوو.
دەستپێکی یادەکە بە خولەکێک بێدەنگی بەڕێوەچوو و دواتر لەلایەن چالاکوانانەوە بە وتە و دروشمی جیاواز جیاواز، بە خوێندنەوەی ڕاگەیاندراو یادی ۱۳هەمین ساڵوەگەڕی شەهیدی قەلەم سەردەشت عوسمان کرایەوە.
هاوکات لە چالاکیەکەدا وێنەی شەهیدانی رۆژنامەنوس وەداد حسێن و کاوە گەرمیانی بەرزکرانەوە و و هەروەها داوای ئازادی بۆ چالاکوانی سیاسی دیاری گۆرەپانی شەقامی کوردی، عەلی محمود ناوسراو بە عەلی سیاسی کرا.
چالاکوانان بەدروشمی ‘خوێنی رۆژ نامەنوسانمان بەفیڕۆ نادەین’ و ‘دادگای گەل چاوەڕوانی دادگایکردنی گەندەڵکاران، بکوژان و مافیاکان و دەسەڵاتدارانی هەرێمە’ خواستی خۆیان بۆ سزادانی تاوانباران و گەندەڵکاران خستەڕوو.
چالاکییەکە بۆ ماوەی دوو کاتژمێر و تا کاتژمێر چواری ئێوارە لەسەنتەری شاری بێرمینگام بەردەوامی هەبوو .
