سۆران عومەر: لە دادگای فیدڕاڵیی سکاڵای لەسەر کورسی پێکھاتەکان لەبارەی پارلمانی کوردستان تۆمارکردوە
سۆران عومەر ئەندامی پارلمانی عێراق راگەیاند، لە دادگای فیدڕاڵیی سکاڵای لەسەر کورسی پێکھاتەکان لەبارەی پارلمانی کوردستان تۆمارکردوە بۆ ھەڵوەشاندنەوەی ئەو ماددە یاسایەی کە ١١ کورسی کۆتای بە پێکھاتەی تورکمان و مەسیحیی و ئەرمەن بەخشیووە.
سۆران عومەر ئەوەشی روونکردەوە، بەگوێرەی ماددە یاسایەکەی ھەڵبژاردنی ساڵی ١٩٩٢، پێنج کورسی بۆ تورکمان و پێنج کورسی بۆ مەسیحییەکان و کورسییەکیش بۆ پێکھاتەی ئەرمەن دیاریکراوە کە ئەوەش ھیچ دادپەروەرییەکی تێدا نییە و پێچەوانەی ئەو یاسایەی دیکەیە کە دواتر و لە ساڵی ٢٠١٥ دەرچووە وەک یاسای مافی پێکھاتەکان.
ئەو پارلمانتارەی عێراق وتیشی، سکاڵاکەی لەسەر ئەو پرسە لە دادگای فیدڕاڵیی وەرگیراوە و رێڕەوی خۆی وەرگرتووە، وردەکاریی زیاتریش لەوبارەیەوە لە رۆژی دادگاییەکە ئاشکرادەکرێت.
