تەڤگەری ئازادی کۆمەڵگاى کوردستان بە دانانی گوڵ لەسەر مەزاری شەھیدان لە شارۆچکەی قەڵادزێ یادی بۆردومانکردنی ئەو شارۆچکەیان کردەوە
ئەمڕۆ تەڤگەری ئازادی کۆمەڵگاى کوردستان بە دانانی گوڵ لەسەر مەزاری شەھیدان لە شارۆچکەی قەڵادزێ یادی بۆردومانکردنی ئەو شارۆچکەیان کردەوە و ڕایانگەیاند، کە یەکێتی نەتەوەیی تاکە ڕێگایە بۆ پاراستنی گەلەکەمان لە کۆمەڵکوژى، دەشڵێت: ئەرکی دەسەڵاتدارانی ھەرێمە، قەرەبووی زیان لێکەوتوان بکاتەوە.
ئەمڕۆ دوو شەممە، لە قەڵادزێ مەراسیمی ساڵیادی بۆردومانی ٢٤-٤-١٩٧٤ و خۆپیشاندانەکانی ٢٤-٤-١٩٨٢ی شارەکە بەڕێوەچوو.
ڕۆژی ١٩٧٤/٤/٢٤ ڕژێمی بەعسی عێراق، بە فڕۆکە بۆردومانی شارۆچکەی قەڵادزێی کرد، ١٦٣ کەس شەهید بوون کە بەشێکی زۆریان مامۆستا و خوێندکاری زانکۆ بوون و نزیکەی ٣٠٠ کەسیش بریندار بوون، پاشان ساڵی ١٩٧٨ ەوە تا ١٩٧٩ دانیشتوانی شارۆچکەی قەڵادزێ و زۆربەی گوندەكانی راگوێزران و شارۆچکەکە و گوندەکانی تێکدران.
