یەکێتی نەتەوەیی لایەنە کوردستانیەکان ڕێ لە پیلان و مەترسیەکانی نەیاران دەگرێت و زامنی پاراستنی دەستکەوتەکانى ڕاپەڕین دەکات.

کوردستان, گرنگ

نووسەردەرچە

ئازار 6, 2023

263

0

کۆنسەی بەڕێوەبەریی کۆنگرەی نەتەوەیی کوردستان- کەنەکە لە ٣٢ یەمین ساڵیادى هاوڵاتیانى هەرێمى کوردستان دژى ڕژێمى بەعس ڕاگەیەندراوێکى بڵاوکردەوە.

لە ڕاگەیەندراوەکەدا هاتووە، ٣٢ ساڵ لەمەوبەرو لە دەرفەتێکی مێژوویی گونجاودا، گەلی کوردستان بە ڕاپەڕینێکی جەماوەریی دامودەزگاو دەسەڵاتی ڕژێمی بەعسی عێراقی لە باشووری کوردستان ڕاماڵی، ڕژێمێک، کە ساڵانێکی زۆر هەموو شێوازەکانی چەوساندنەوە و لەناوبردنی خەڵکی کوردستانی گرتبووە بەر. هەموو چەکە مۆدێرن و قەدەغەکراوەکانی لە دژی کورد بەکار هێنا و گەیشتە قۆناغی جینۆساید، بەڵام چونکە خەڵکی کوردستان و هێزە سیاسیەکانی لەسەر بەرگریکردن و گرتنە دەستی چارەنووسی خۆیان تەبا و یەکدەنگ و یەکهەڵوێست بوون، توانیان لەمپەرەکان ببڕن.

کۆنگرەى نەتەوەى کوردستان دەشڵێن، بە دڵنیایی ئەوەی لەو کاتەدا کوردستان و گەلی کوردی پاراست، لە پلەی یەکەمدا یەکێتی ناوخۆیی و نەتەوەیی کوردان بوو، پشت بەستن بوو بە هێزی لەبن نەهاتووی خەڵکی کوردستان، کە لە ئێستدا ئەو راستییە لە هەموو کات زیاتر خۆی ئەسەپێنێت.

کەنەکە ئەوەى ڕووونکردوەتەوە، ڕاپەڕین و کۆڕەوی بەهاری ١٩٩١ وەرچەرخانیکی گەورە بوو لە مێژووی کوردستاندا و پەنجەرەیەکی فراوانی بە ڕووی کوردستانیاندا کردەوە و ئاسۆ و ئەزمونێکی نوێی خستە بەردەم خەڵك.

باسلەوەشکراوە، ڕاپەڕین بووە جێی هیوای هەموو پارچەکانی کوردستان و لە هەرچوارلاوە هاوکاری کرا و دواتر پەرلەمان و حکومەتی هەرێمی کوردستان پێکهات و بوون بە دەسکەوتێکی نەتەوەیی لە مێژووی ئێمەدا و خەڵکی کوردستان بە گشتی بەم دەستکەوتە شادمان بوون. لە هەل و مەرجێکی سەخت و بە نەبوونی و برسێتی و هەژاری پاراستیان و خستیانە سەرپێ.

لە پەیامەکەی کەنەکەدا ئاماژەبەوەشکراوە، ئەگەرچی ئەم ئەزموونە بە قۆناغی سەخت و ململانێی دژوار و شەری ناوخۆو نەداری خەڵکدا تێپەڕی، بەڵام گەلی کوردستان هەروەک دەسکەوتێکی نەتەوەیی سەیری ئەکەن و ئەیپارێزن، بۆیە لەسەر بەڕێوەبەرێتی هەرێمی باشوور پێویستە، کە هەمیشە ویست و ئیرادەی جەماوەری کوردستان لەبەرچاو بگرێت.

هەروەها کەنەکە دەشڵێت: ئێستا سەرەڕای ئەوەی، کە ئەزموونی باشووری کوردستان بە قەیرانی قوڵ و قۆناغیکی سەختی ئابووری و سیاسی و بەڕێوەبەرایەتیدا تێپەڕئەبێت، رووبەڕووی پەلاماری تێرۆریستان و پیلانی هێزە داگیرکەرەکانی کوردستانیش بووەتەوە و ئەمەش نەک تەنیا باشووری کوردستان، بەڵکو ئەزموونی رۆژئاوای کوردستان و خەباتی پارچەکانی تریشی خستووەتە مەترسییەوە.

کەنەکە ڕاشیانگەیاندووە: لە ئێستادا لە هەرکات زیاتر یەکێتی نەتەوەیی و سەنگەری هاوبەشی جەماوەر و هێزە کوردستانیەکان رێ لە پیلان و مەترسیەکانی نەیاران ئەگرێت و زامنی پاراستنی دەستکەوتەکان ئەکات.

لە درێژەى ڕاگەیەندراوەکەدا هاتووە، ئەمڕۆش دوای ٣٢ ساڵ دەستکەوتەکانی راپەڕینی باشووری کوردستان هەروەک دەستکەوتەکانی شۆڕشی رۆژئاوای کوردستان لە ژێر هەڕەشەدان و هێزە نەیار و داگیرکەرەکان، بە تایبەتیش دەوڵەتی تورکیا پیلانی لە دژ ئەگێڕن، هەر بۆیە بە هەموو شێوازێک پێویستیان بە پاراستن و پێشخستنە.

باسلەوەش کراوە، پارێزەری ڕاستەقینەی دەستکەوتەکانیش گەلی کوردستان و یەکێتی نەتەوەیی خەڵکی کوردستان و هێزە سیاسیەکانین و هەموو هێزە کوردستانیەکانی هەموو پارچەکانی کوردستان بەرپرسیارێتی مێژووی ئەو پاراستنەیان لە ئەستۆدایە، ئەگەر نا مێژوو بەزەیی بە کەسدا نایەت، بۆیە پێکهێنانی چەتری هاوبەشی بەرگری و پاراستن ئەرکێکی هەنووکەیی و هەرە پێویستی ئەم قۆناغەیە.

کەنەکە ئەوەشیان خستووەتەڕوو، ئێمە لە یادی راپەڕینە شکۆدارەکەی گەلی باشووری کوردستاندا، پیرۆزبایی لەهەموو کوردستانیان ئەکەین و بە شانازییەوە ئەو راپەڕینە بەرز ئەنرخێنین و بەهیواین لە یادی راپەڕیندا کێشە ناوخۆییەکانی هێزە کوردستانیەکان بە دیالۆگ و لۆژیک چارەسەر بکرێن و پیلانەکانی داگیرکەران پووچەڵ بکرێنەوە.

لە کۆتایشدا کەنەکە دەڵێت، بۆ باشووری کوردستانیش هیواخوازین لە زووترین کاتتدا قەیرانە ئابووری و سیاسیەکانی تێپەڕێنێت و بژێوی خەڵک و دابینکردنی ژیانێکی شایستە لە ژێر سایەی دەستور و سەروەریی یاسادا بۆ خەڵک دابین بکرێت، چونکە گەلی باشووری کوردستان شایانی ئەوەن و سەری رێز بۆ هەموو گیانبەختکردوانی خەباتی رەوای گەلەکەمان دائەنەوێنین.

دەرچە