ئەردۆگان لە بری داوای لێ بوردن، نكۆڵی لە كۆمەڵكوژی زاخۆ دەكات، وەزیری بەرگری عێراقیش هەڕەشەی ڕووبەڕووبوونەوەی سەربازی لەگەڵ توركیا دەكات
ئەردۆگان، سەرۆک کۆماری تورکیا ڕایگەیاند ئەو هێرشە تیرۆریستییەی كرایە سەر پارێزگای دهۆک لە عێراق، هاوشێوەی ئەو هێرشانە بوو کە لەلایەن چەکدارانی پەکەکەوە ئەنجامدراون ، لێدوانەكەی سەرۆكی توركیا نكۆڵی كردنە لەوەی دەوڵەتەكەی ئەو كۆمەڵكوژیەی كرد بێت و لە هەمان كاتدا خۆی لادەدا لە ناوهێنانی هەرێمی كوردستان.
ئێوارەی ڕۆژی دووشەممە ئەردۆغان لە پەخشێکی ڕاستەوخۆدا لە کەناڵی ڕادیۆ و تەلەڤیزیۆنی تورکی (TRT) ڕایگەیاند: “ئەنقەرە داوای لە ئەمریکا و ڕوسیا و براکانمان لە عێراق کردووە کە نەکەونە داوی ئەوەی كە توركیا بە بكەری ئەو كۆمەڵكوژیە بزانن”
سەرۆکی تورکیا ڕایگەیاند کە هێرشەکە هاوشێوەی ئەو هێرشانەیە کە لەلایەن شەڕڤانانی پەکەکە و یەپەگە و پەیەدەوە ئەنجامدراون.
وەزیری بەرگری عێراق جومعە عناد ڕایگەیاند كە سوپای عێراقی توانای ڕووبەڕووبونەوەی سەربازیی لەگەڵ تورکیا هەیە و ناچار دەبین كە بە سوپا هێرشەکانی توركیا ڕابگرین، بەڵام ئێمە وەك عێراق چاوەڕێی چارەسەری سیاسی و دیپلۆماسین و ڕایگەیان كە شەڕ جگە لە وێرانکردن و خوێن ڕشتن هیچی تر بە دوایی خۆێدا ناهێنێت.
وەزیری بەرگری لە لێدوانە تەلەفیزیۆنییەکانی درەنگانی ڕۆژی دووشەممەدا وتی: “عێراق ڕۆژی سێشەممە، یەکەم شەڕی دژی تورکیا لە ئەنجومەنی ئاسایشدا دەکات و چاوەڕوانین عێراق لە بواری دیپلۆماسیەتی چی بەدەست دەهێنێت”
جومعە، وتیشی: بارودۆخی سەر سنووری تورکیا و عێراق زۆر مەترسیدارە و لەهەوڵی ئەوەداین هێزەكانی پاسەوانی سنووری فیدراڵی چەكدار و بەهێز بكەین و بەرەو سنورەكان جوڵەیان پێبكەین بۆ کۆتاییهێنان بە هاتنە ناوە و دەستدرێژیەكانی تورکیا لە عێراق
سوپای تورك ڕۆژی چوارشەممەی ڕابردوو گوندی (بەرخ)ەی گەشتیاریی سەر بە پارێزگای دهۆك تۆپباران کرد و لە ئەنجامدا کۆمەڵکوژییەکی هاوڵاتیانی مەدەنی لێکەوتەوە کە دەیان ژن و منداڵی تێدا کوژرا و بریندار بوون
