پێم دەڵێن بێدەنگ بە چونکە دۆخەکە ئاڵۆزە؟! منیش دەڵێم دەبێ دەنگ هەڵبڕین لەبەر ئەوەی دۆخەکە نەک تەنیا ئاڵۆزە، بەڵكو هەستیار و بڕیاردەر و چارەنووسسازە
نوسەر ، دلێر ئاکرەیی
هێزەکانی سوڵتان پەنجا رۆژە بە هەموو جۆرە چەک وکەرەسەی سەربازی و جبەخانە و تەکنۆلۆژیای سەردەمەوە هێرشی ناوچە شاخاوییەکانی باشوری کوردستان دەکات و گەریلاکانی هەپەگەش بە ئیرادەیەکی پۆلایین و ورەیەکی بەرز و تەکتیکی نوێی شەڕی پارتیزانیەوە بەرگریان لێدەکات و داگیرکەران سزا دەدات…
کەچی ئەوانەی شانازی بە چەک و تەکنۆلۆژیا و دڕندەیی سوڵتان دەکەن یان خەڵکی پێیان دەترسێنن، یان ئەوانەی لە هێزی زۆر و زەوەندی دوژمن دەتۆقێن، یاخود راستینەی بەرخۆدانی گەریلاکان نایبینن یان نایانەوێت ببینن، دەبێ لەم سیناریۆیە ورد ببنەوە:
ئەگەر ئێوە لە دوورەوە لە هێزەکانی سوڵتان تۆقاون کە هێشتا پاسەوانانی چیاکان بە خوێن و گیانی خۆیان دەیانپارێزن و ناهێڵنن داگیربکرێن، ئەو کاتەی کە ئەو شاخانە دەکەونە ژێر رکێفی ئەو هێزانەوە ئەوسا لە ئارامی و ئاسودەیی ژیان بێبەش دەبن. ئیدی یان دەبێ ببن بە کۆیلەی سوڵتان یان پەنا ببەنە بەر شوێنەکانیتری سەر گۆی ئەم زەوییە، یان بۆ ئەو شوێنانە رادەگوازرێن کە سوڵتان فەرمانیان بۆ دەردەکات ومێژووش پێمان دەڵیت تا ناوی سوڵتان لە دونیادا ماوە، لەوێ دەمێننەوە ؟!!.
بێدەنگی و بێباکی و نامەردایەتی و سەردانواندنی ئەو کەسانەی بەرامبەر بە هەڕەشە و پەلامارەکانی سوڵتان، دەبنە لێزمەی مەرگ و بەسەریاندا دەبارێ. ئەو کەسانەیشی کە بۆ بەدەستخستنی پارۆ نانێک دەست بەكڵاوەکانیان گرتووە، جگە لە شکۆشکاندن و کۆیلێتی هەرگیزچێژ لە هەڵمژینی هەناسەی ئازادی وەرناگرن.
کەچی ئەوانەی کە دەبنە کەوا سووری پێش لەشکری دوژمن ئەوە لەم دونیادا جگە لە رووڕەشی و شۆرەیی وسەرشۆڕیەوە شتێکی دیکەیان بۆ نامێنێتەوە و ناووناتۆرەیان لە لاپەڕە رەشەکانی مێژوودا بۆ هەتا هەتا تۆمار دەکرێت و ناسڕێتەوە.
بۆیە نامەوێ بێدەنگی هەڵبژێرم، چونکە ئەوەی ئەمڕۆ لە باشوری وڵات دەقەومێت چارەنووسەکەی منیش دەستنیشان دەکات..
ئیدی بە کەس مەڵێن بێدەنگ بە، بەڵکو بە پێچەوانەوە بە خەڵکەکە بڵێن تا هێزتان تیایە دەنگ هەڵبڕن، تا بتوانن هاوار بکەن و بیقێڕینن، چونکە هێشتا کاتی هاوارکردن و قیڕاندنمان لە بەردەستدا ماوە، ئەگەر سوڵتان خۆڕاگری چیاکانی بەزاند، هاوار و قێڕینیشمان لێ قەدەغە دەکات..
راستە چەک و تەکنۆلۆژیای سوڵتان خاکی کوردان دەکێڵێت، گوندی کوردان خاپوور دەکات ، زەوی و پاوانەکانیان بە هەموو جۆرە بۆمب و قومبارە و گوللە تۆپ و موشەک و جۆرەها تەقەمەنی بارانڕێژ دەکات، ،گوندنشینان دەربەدەر دەکات، سیاسەتی زەوی سووتێندراو پیادەکات، دار و دارەستانەکان دەبڕێت، بەڵام ئەگەر سوڵتان لەم جەنگە چارەنووسسازەدا سەرکەوت و چیاکانی کوردستانی فەتح کرد، ئەوە خەڵکی بیانی هاوردەی ئەوێ دەکات و وەکو پاسەوانی شاخەکانی باشوری قەڵەمڕەوی خۆی دایاندەمەزرێنێت.. ئەگەر بۆ سوڵتان لوا و دوا شاخی داگیرکرد کە دەڕوانێتە بیرە نەوتیەکانی بابەگوڕگوڕ، ئەوسا لەوێوە هەناسەی دڵخۆشی و شادی هەڵدەمژێت. پاشان دەست بە هەڵمەتی راگواستن و کۆچپێکردن و دەربەدەرکردن دەکات… چونکە باش دەزانێت تا چیاکان بە دەست کوردەکانەوە بێت دڵی ئوقڕە ناگرێت…
راستیەکی دیکەش هەیە کە شەڕی کورد کوژی شەڕێکی مەترسیدارو کارەساتبارو ماڵوێرانکەرانەیە و دەبێ هیچ کوردێک تا خەونیشی پێوە نەبینێت، بەڵام دەبێ ئەوەشمان لە بیر نەچێت کە لەوانەیە گوللـەیەکی وێڵ ببێتە هۆی هەڵگیرسانی ئاگری شەڕێکی نەخوازراوەوە.
ئەوەی تا ئێستا کراوە بۆ وەلانان یان خامۆشکردنی هۆکارەکانی ئاگری شەڕی خۆکوشتن لە هەرێمی کوردستان هیچ دەرهاوێشتەیەکی لە سەر ئەرزی واقیع بەدی ناکرێت. هۆیەکەش بۆ ئەوە دەگەڕێتەوە ئەگەر تەنیا نارەزاییەکان لە چوارچێوەی زارەکیدا بمێننەوە و هیچ هەنگاوێکی کرداری لە شێوەی کارتی فشار بۆ بەرگرتن لەو شەڕە نەنرێت، بڕوا ناکەم ببنە بەربەست لەبەردەم هەڵگیرسانی ئەو شەڕە نگریسە کە بەرۆکی هەر هەموومان دەگرێتەوە. چونکە هات و هاوار و هەڕەشە و گوڕەشەی سوڵتان و دەس و پێوەندەکانی بە زەقی دەبینرێت و بە روونیش دەبیسترێت، کە کەشێکی خەمناکی پڕ مەترسیی خوڵقاندووە. دەنگی دەهۆڵی جەنگ و زوڕنای راگەیاندنەکانی سوڵتان و دارودەستەکانی، ریتمی مەرگ دەبارێنن. ریتمێک خوێنی بێتاوانانی لێ دەچۆڕێ. چونکە دڵی سوڵتان ئارام نابێت تا ئەفسانەی چیاکانی کوردان نەسڕێتەوە کە لە دێر زمانەوە بۆیان ماوەتەوە و بوون و مانەوەیان پاراستووە..
سوڵتان ئەمەش دەزانێت کە تا زنجیرە چیاکانی مەتینا، گارە، قەندیل، ناوچە شاخاویەکانی ئاڤاشین، زاپ ، سیدەکان ، چۆمان،رەواندۆز، رانیە و ئەوانی دیکە کۆنتڕۆڵ نەکات، ناتوانێت باڵادەستی خۆی بە سەر ناوچە تەختاییەکانی ویلایەتی موسل و بیرە نەوتیەکانی کەرکوک و شوێنەکانیتری باشوری کوردستاندا بسەپێنێت..
بەڵێ ئەردۆغان باش دەزانێت بۆ ئەوەی خەونە گەورەکەی جێبەجێ بکرێت و ببێتە سوڵتان، دەبێ سەردەمی ئەتاتورکی باوکە گەورەکەی تێپەڕێنێ و لە سەدساڵەی پەیماننامەی لوزاندا ویلایەتی موسل بگەڕێنێتەوە بۆ سەر دایکی نیشتمان، بەڵام ئەمجارە بە نەوت و گاز و سەروەت و سامانەوە… ئەمەش بە بێ داگیرکردنی چیا سەرکەشەکانی باشوری کوردستان مەحاڵە دڵی سوڵتان ئاو بخوات.
ئیدی سوڵتان چاوی بڕیوەتە ئەو چیایانەی کە سیمبۆڵی لە مێژینەی کوردان و رازی مانەوەیان و نیشانەی شانازی و سەرفیرازیانە و دەیەوێ ئەو راستینەیە بسڕێتەوە کە کوردان جگە لە چیاکان هیچ دۆستێکی دیکەیان نیە ..
ئەگەر دەتانەوێ ئەو راستینەیە نەسڕێتەوە و عەرشەکەی سوڵتان نەبینن، نەک تەنیا کڕ و کزو داماو نەبن، بەڵکو بەشێوەیەک دەنگ هەڵبڕن کە دڵی ئەردۆغان و نۆکەر وهاوکارەکانی بتۆقێنن.
